Нигерија: Во оружен напад на пазар загинаа најмалку 43 лица

АБУЏА

Најмалку 43 лица загинаа кога осомничени вооружени лица извршија упад на пазар во северна Нигерија, вели локален претставник, пренесува Агенција Анадолија (АА).

„Штотуку го завршивме состанокот со некои засегнати страни и потврдив дека за жал загубивме 43 луѓе во тој инцидент“, рече Амину Вазири Тамбувал, гувернер на државата Сокото.

Тамбувал рече дека безбедносните сили се испратени во регионот, додавајќи дека треба да бидат распоредени повеќе сили за да се справат со безбедносните проблеми.

Нигерискиот претседател Мухамаду Бухари го осуди инцидентот, велејќи дека деновите на одговорните за нападот се изброени.

Претходно, портпаролот на владата во Сокото, Мухамед Бело, рече дека нападот го извршиле неидентификувани напаѓачи во регионот Горонио.

Тој рече дека во нападот има и многу ранети.

Нигериската држава Сокото често е мета на вооружени групи. Во сличен оружен напад на 10 октомври загинаа 20 луѓе, а многумина беа ранети.

Во друг смртоносен напад на 8 октомври, загинаа 11 лица, меѓу кои и деца и имамот на џамија, а имаше и ранети, кога осомничени вооружени лица од забранета група на одмазници Јан Сакаи упаднаа на пазар во селото Маманде во областа Гвадабава.