Норвешка невладина организација: „Неселективните израелски напади се воени злосторства“

АНКАРА (АА) - Неселективните напади на Израел врз палестинските деца и жени очигледно претставуваат воени злосторства, изјави Јан Егеланд од норвешка невладина организација, јавува Анадолу.

„Срамно е да се продолжи да се води војна низ бегалските кампови“, наведе Егеланд, генерален секретар на Норвешкиот совет за бегалци, на социјалната мрежа Х.

Тој нагласи:

„Дури и ако Хамас извршил воено злосторство за криење борци меѓу раселените цивили, овие континуирани, неселективни напади во кои загинаа голем број деца и жени очигледно се израелски воени злосторства.“

Најмалку 39 Палестинци беа убиени денес во напад на израелски авиони врз училиште во кое привремено беа сместени илјадници раселени лица во бегалскиот камп Нусејрат во централниот дел на Појасот Газа.

Израел ја продолжува својата брутална офанзива против Појасот Газа и покрај Резолуцијата на Советот за безбедност на Обединетите нации со која се бара итен прекин на огнот.

Според локалните здравствени власти, оттогаш во Газа се убиени повеќе од 36.580 Палестинци, од кои повеќето жени и деца, а повеќе од 83.000 се повредени.

Израел е обвинет за геноцид пред Меѓународниот суд на правдата (МСП), кој во својата последна пресуда му нареди на Тел Авив веднаш да ја прекине својата воена операција во Рафа во јужниот дел на Појасот Газа, каде што повеќе од еден милион Палестинци побараа засолниште од војната пред да почне копнениот напад врз градот на 6 мај.