Партнери од НАТО формираа коалиција за „електромагнетска војна“ за да ја поддржат Украина

БЕРЛИН (АА) – Неколку партнери од НАТО формираа коалиција за поддршка на Украина во нејзините капацитети за „електромагнетска војна“, соопшти денес германскиот министер за одбрана Борис Писториус, јавува Анадолу.

Зборувајќи со новинарите во Брисел пред состанокот на Контакт-групата за одбрана на Украина, Писториус најави дека Германија и нејзините сојузници ќе ја засилат поддршката за Украина како одговор на тековните руски напади.

„Како што знаете, ние ѝ помагаме на Украина да развие воени капацитети не само за сегашноста туку и за периодот по завршувањето на војната“, рече Писториус.

Тој посочи дека сојузниците и партнерите веќе формирале осум коалиции за капацитети за поддршка на Украина во различни области, меѓу кои артилерија, оклопни возила и ракетна одбрана.

„Германија сега формираше деветта коалиција, со 10 партнери што досега се приклучиле. Оваа коалиција е фокусирана на електромагнетска војна – област со сè поголемо значење, која опфаќа заштита на сопствените комуникации, извидување, нарушување на комуникациите на непријателот и одбрана од беспилотни летала“, изјави тој.

Претставници од околу 40 земји – претежно сојузници на НАТО – се собираат денес во седиштето на Алијансата на 27. состанок на Контакт-групата за одбрана на Украина. Велика Британија и Германија првпат копретседаваат со состанокот откако американската администрација им го пренесе на европските сојузници водството на овој формат.

Писториус рече дека американскиот секретар за одбрана Пит Хегсет ќе се приклучи на состанокот преку видеоконференција, а посебна американска делегација ќе присуствува лично.