Пет лица загинаа, двајца се исчезнати во поплавите во Казахстан

АСТАНА (АА) - Казахстан се бори со разорни поплави во кои пет лица загинаа, а две се водат за исчезнати, потврди заменик-министерот за внатрешни работи на Казахстан, Марат Коцаев, по седницата на Сенатот, пренесува Анадолу.

Коцаев рече дека четири лица се удавиле во регионот Атирау, додека едно дете загинало во регионот на Туркистан.

Тој додаде дека во тек се операциите за лоцирање на две исчезнати лица во провинцијата Абај.

Казахстан продолжува да се бори со поплавите предизвикани од брзото топење на снегот и обилните врнежи. Според Министерството за вонредни ситуации на Казахстан, „вонредната состојба“ сѐ уште е во сила во 38 населени места во осум региони поради поплавите.

Во спасувачките операции од подрачјата погодени од поплавите успешно се евакуирани 117.694 лица. Досега во своите домови се вратиле 18.651 лице, а 6.887 се згрижени во привремени прифатилишта.

Во провинциите Акмола, Актобе, Атирау, Костанај и Северен Казахстан поплавени се 5.718 домови.

Повеќе од 44.000 членови на различни служби за одговор при итни случаи, вклучително и воени сили, се ангажирани во обезбедувањето помош при поплавите на ранливото население.