Платформите на социјалните медиуми обвинети за цензорирање содржини за Газа

РАБАТ (АА) - Социјалните мрежи и дигиталните платформи одиграа клучна улога во публицизирање на војната во Газа, но се соочуваат со обвинувања за алгоритамска пристрасност и цензура на содржината, велат експертите, јавува Анадолу.

Во текот на изминатата година, Палестинците користеа дигитални содржини за да ги пренесат случувањата во Газа до пошироката јавност низ арапскиот, исламскиот и западниот свет, што предизвика демонстрации со поддршка низ светот.

Сепак, експертите сметаат дека алгоритмите на платформите на социјалните медиуми го ограничуваат ширењето на палестински содржини.

Интензивниот дигитален ангажман на младите Палестинци го натера Израел да ги таргетира истакнатите личности од социјалните мрежи, сопственици на канали на Јутјуб и новинари кои емитуваат директен пренос од Газа, изјави за Анадолу Абдулхаким Ахмине, марокански експерт за медиуми и комуникации.

„Некои земји, особено Франција и Германија, првично воведоа одредени дигитални ограничувања, но беа принудени да се повлечат поради зголемената народна поддршка за Палестина“, рече Ахмине.

Тој забележа „комуникациски притисок“ врз младите луѓе кои се изразуваат себеси на овие платформи.

Хасан Харџуџ, технолошки истражувач, изјави: „Алгоритмите на дигиталните платформи силно ја цензурираат палестинската содржина и го лимитираат нејзиното дистрибуирање.“ Тој додаде дека корисниците развиле техники за избегнување на отстранувањето на содржината.

„Сада Сошал“, истражувачки центар со седиште во Палестина, документираше над 5.450 прекршувања на дигитални содржини поврзани со Палестина во првите четири месеци од 2024 година.

Откри дека Инстаграм има 32 отсто од прекршувањата, Фејсбук 26 отсто, ВатсАп 16 отсто, ТикТок 14 отсто и Х 12 отсто.

И покрај овие предизвици, социјалните медиуми остануваат клучна алатка за ширење информации за геноцидните дејства на Израел во регионот.