Приведени 22 Палестинци во рациите на израелската Армија на Западниот Брег

РАМАЛА (АА) - Израелските сили приведоа уште 22 Палестинци во новите рации низ окупираниот Западен Брег синоќа и рано утринава, соопштија групите за правата на затворениците, јавува Анадолу.

Во заедничкото соопштение на Комисијата за прашања на затворениците и Здружението на палестинските затвореници се наведува дека меѓу приведените има и четири жени.

Повеќето Палестинци се приведени во градовите Рамала, Ал Кудс (Ерусалим), Тулкарм, Џенин, Хеброн и Витлеем.

„Според најновите податоци, вкупниот број на приведени од 7 октомври минатата година е зголемен на 7.920“, се наведува во соопштението.

Од 7 октомври 2023 година, кога израелската Армија го започна својот напад врз Појасот Газа, зголемен е бројот на притворања, рации и напади врз Палестинците на окупираниот Западен Брег и Источен Ал-Кудс.

Според Министерството за здравство, оттогаш во напади на израелската Армија врз окупираните територии се убиени повеќе од 455 Палестинци, а околу 4.750 се ранети.