Привремениот претседател на Иран, Мохбер: Инцидентот тежок за државата, нема да има празнини во администрацијата

ТЕХЕРАН (АА) - Привремениот претседател на Иран, Мухамад Мохбер, кој ја презеде функцијата откако претседателот Ебрахим Раиси загина во хеликоптерска несреќа, рече дека инцидентот е многу сериозен, но дека нема да создаде празнина во администрацијата на земјата, пренесува Анадолу.

Мохбер на седницата на Владата, говореше за хеликоптерската несреќа во која загинаа Раиси и уште неколку ирански претставници, меѓу кои и министерот за надворешни работи, објави иранската агенција Борна.

„Инцидентот е многу тежок за државата, нацијата и челникот на земјата (Али Хамнеи, заб. авт.). Но, овој важен настан нема да создаде никаква празнина во администрацијата под водство на лидерот. Нека луѓето бидат сигурни во тоа“, порача Мохбер.

Обраќајќи им се на државните претставници, Мохбер истакна дека под ниедни околности не смеат да паднат во неред во извршувањето на своите должности.

Хеликоптерот во кој беа иранскиот претседател Раиси, министерот за надворешни работи Хусеин Амир-Абдолахијан, гувернерот на Источен Азербејџан Малик Рехмати и водачот на петочната молитва во Табриз, имамот ајатолах Ал-Хашем, вчера попладне имал „тврдо слетување“ поради временските услови додека се враќал од свеченото отворање на брана на границата со Азербејџан. Подоцна е потврдено дека нема преживеани во несреќата.

Мохбер ги презеде овластувањата на претседателот, а изборите ќе се одржат во рок од 50 дена.