Русија и Украина пријавија цивилни жртви по ноќните воздушни напади

Русија и Украина денес пријавија загинати и повредени цивили по ноќните напади со беспилотни летала и ракети, при што властите од двете страни меѓусебно се обвинуваат за извршените напади, јавува Анадолу.

Украинскиот претседател Владимир Зеленски на Телеграм соопшти дека во напад во регионот Херсон загинале четири лица, а петмина биле повредени. Сите потребни служби се на терен и ги утврдуваат деталите.

Одделно, руската државна нуклеарна корпорација „Росатом“ на Телеграм соопшти дека едно лице загинало, а 17 се повредени кога во украински напад била погодена автобуска постојка што ја користеле работници од Нуклеарната централа Запорожје.

„Вооружените сили на Украина нападнаа постојка за службен превоз кај Нуклеарната централа Запорожје - има еден загинат. Во моментот на нападот, работниците на централата чекале на автобуската постојка што требало да ги однесе на смена. Повредени се 14 лица, а едно лице загина“, се наведува во соопштението.

Во Русија, гувернерот на Башкортостан, Радиј Хабиров, изјави дека напад со беспилотно летало предизвикал, како што рече, „незначителна“ штета на нафтена рафинерија во градот Уфа. Во инцидентот е повреден еден цивил.

Во градот Донецк, во источна Украина, кој е под руска контрола, една жена загина, а друго лице е повредено кога украинско беспилотно летало погодило приватна куќа во Кировскиот Округ на градот, според градоначалникот на Донецк, Алексеј Кулемзин.

Наводите и околностите во врска со пријавените инциденти не можеа независно да бидат потврдени.

И Русија и Украина редовно пријавуваат цивилни жртви во напади со беспилотни летала и ракети во текот на конфликтот, при што секоја страна ја обвинува другата за напади врз цивилни области.