Северна Кореја ги предупреди САД за „непожелни случувања“

АНКАРА (АА) - Вашингтон може да се соочи со „непожелни случувања“ ако продолжи со своите провокации и „вообичаеното непријателство“ против Пјонгјанг, предупреди висок официјален претставник на Северна Кореја, пренесува Агенција Анадолија (АА).

Критикувајќи ја американската „гангстерска логика“, секретарот на Централниот комитет на владејачката Работничка партија на Кореја, Ри Пјонг Чол, рече дека последните ракетни тестирања на земјата се во согласност со нејзиното „легитимно право на самоодбрана“.

Северна Кореја истрела две балистички ракети со краток дострел во четвртокот, помалку од една недела по тестирањето на крстосувачките ракети, во своите први лансирања откако американскиот претседател Џо Бајден ја презеде функцијата во јануари.

Бајден, на прес-конференција подоцна истиот ден, предупреди дека ќе има повратен одговор доколку Северна Кореја продолжи со таквите ескалации, истовремено нагласувајќи дека неговата администрација е „подготвена за одреден вид дипломатија… која зависи од крајниот резултат од денуклеаризацијата“.

Ри, сепак, ги обвини САД и Јужна Кореја дека претставуваат „трајна воена закана за Корејскиот Полуостров“ преку нивните „опасни воени вежби и испорака на најнова тешка машинерија“.

„Изразуваме длабока загриженост од фактот дека извршниот офицер на САД јасно го откри вообичаеното непријателство против Демократска Народна Република Кореја, клеветејќи го нормалното тестирање оружје, што е дел од правото на одбрана на нашата држава, дека е кршење на резолуција на ОН“, рече Ри во изјавата објавена од државната Корејска централна новинска агенција.

„Гангстерска е логиката на САД кои можат во секое време да испраќаат нуклеарен арсенал на Корејскиот Полуостров и да лансираат интерконтинентални балистички ракети, но на ДНРК, една од завојуваните страни, не ѝ е дозволено да тестира тактичко оружје.“

Севернокорејскиот официјален претставник рече дека „воинствениот став на новата американска администрација“ докажува дека прави „погрешен чекор уште од самиот почеток“.

„Ако САД објават неразумни забелешки, може да се соочат со непожелни случувања“, се вели во изјавата.

- Закана од санкции -

Јапонија размислува за продолжување на санкциите кон Северна Кореја, со цел да го принуди Пјонгјанг кон денуклеаризација и да го реши прашањето за киднапирањата на јапонски државјани, јавуваат локалните медиуми.

Санкциите вклучуваат целосна забрана за билатерална трговија и забрана за влез во јапонските води на бродовите и пловните објекти регистрирани во Северна Кореја, кои чекаат во севернокорејските пристаништа“, објави новинската агенција „Кјодо“.

Кабинетот на премиерот Јошихиде Суга најверојатно ќе го одобри потегот на почетокот на следниот месец.

Јапонија воведе санкции кон Северна Кореја кога Пјонгјанг првпат тестираше нуклеарно оружје уште во 2006 година.

Токио исто така го обвинува Пјонгјанг и за киднапирањето на 17 јапонски државјани.

Во петокот, Советот за безбедност на ОН, исто така, го продолжи мандатот на експертите што му помагаат на комитетот кој ги надгледува воведените санкции против Северна Кореја до април 2022 година.