Berk Kutay Gökmen
18 Ноември 2026•Ажурирано: 18 Ноември 2026
Кинескиот претседател Си Ѓинпинг денес го пречека американскиот претседател Доналд Трамп во Кина, изразувајќи надеж за продлабочување на разговорите за билатералните односи, соработката во Азија и Пацификот и меѓународната ситуација, пренесува Анадолу.
„Кина е земја што ја цени учтивоста и има традиција на возвраќање на гостопримството“, му рече Си на Трамп, пренесе кинеската новинска агенција Синхуа, осврнувајќи се на свечениот пречек што Трамп и неговата сопруга Меланија му го приредија за време на неговата посета на САД во септември.
„Ви посакувам добредојде во Кина и се надевам на темелна размена на мислења за важните прашања поврзани со односите меѓу Кина и САД, соработката во Азија и Пацификот и меѓународната ситуација“, рече Си, повикувајќи на конструктивни односи засновани врз „почитување, правичност и заемност“.
Трамп му се заблагодари на Си што лично го пречекал на аеродромот, истакнувајќи дека е воодушевен што повторно ја посетува Кина и дека верува оти посетата дополнително ќе ги унапреди билатералните односи и ќе заврши со целосен успех, објави Синхуа.
Во рамките на свечениот пречек беше изведен и прелет на кинески борбени авиони, со што беше возвратено на пречекот што Си го доби за време на државната посета на САД.
Трамп пристигна во Кина за да учествува на самитот на форумот за Азиско-пацифичка економска соработка (АПЕК), а се очекува разговорите да ги опфатат трговијата, регионалната безбедност и тековните конфликти, меѓу кои војните во Иран и Украина.
Се очекува и планираната трилатерална средба утре меѓу Си, Трамп и рускиот претседател Владимир Путин да биде посветена на глобалниот мир.
Ова е трета средба меѓу Си и Трамп во текот на оваа година.
Според Белата куќа, Трамп во средата требало да одржи и две одделни средби – една со мексиканската претседателка Клаудија Шејнбаум, а друга со канадскиот премиер Марк Карни.