Ömer Tuğrul Çam
15 Февруари 2023•Ажурирај: 16 Февруари 2023
БРИСЕЛ (АА) - Генералниот секретар на НАТО, Јенс Столтенберг, соопшти дека утре ќе допатува во Туркије каде што ќе се сретне со турскиот претседател Реџеп Таип Ердоган и ќе ја достави пораката на НАТО за солидарност поради земјотресите, јавува Анадолу.
На прес-конференцијата по завршувањето на состанокот на министрите за одбрана на земјите членки на НАТО, Столтенберг одговори на прашањето на новинарот на АА, информирајќи за поддршката за Туркије и за неговата утрешна посета на оваа земја.
Столтенберг истакна дека сите сојузници упатиле длабоко сочувство и поддршка до Туркије поради земјотресите со епицентар во Кахраманмараш.
„НАТО, како и неговите сојузници и партнери, ја зголемија нивната поддршка“, додаде Столтенберг.
Тој рече дека покрај помошта на сојузниците, НАТО ќе испрати и објекти за домување, кои во наредните неколку дена ќе бидат доставени во Туркије.
„Утре ќе бидам во Туркије со цел да се сретнам со претседателот Ердоган и министерот за надворешни работи, Мевлут Чавушоглу, и до нив да упатам сочувство и солидарност“, нагласи тој.
Според него, на овие средби ќе се разговара за координацијата за помошта обезбедена од НАТО и од сојузниците.
„Упатувам благодарност до нашите сојузници поради нивната поддршка за Туркије. Денешниот состанок на министрите за одбрана го завршив упатувајќи апел до сојузниците да дадат повеќе поддршка и да ја зголемат стратешката помош“, додаде Столтенберг.
