Ahmed Asmar
08 Февруари 2025•Ажурирај: 09 Февруари 2025
АНКАРА (АА) - Палестинските медицински и спасувачки тимови извлекоа уште 22 тела од урнатините во Појасот Газа, со што вкупниот број на убиени Палестинци во геноцидната војна на Израел од октомври 2023 година наваму изнесува 48.181, соопшти денес Министерството за здравство во Газа, јавува Анадолу.
Министерството наведе дека кон билансот во последните 48 часа се додадени уште четворица Палестинци убиени од израелски оган.
Според Министерството, во болниците се примени и пет повредени лица, со што нивниот вкупен број достигна 111.638.
„Многу жртви сѐ уште се заробени под урнатините и на патиштата бидејќи спасувачите не можат да стигнат до нив“, нагласи Министерството.
Оттаму е соопштено дека 572 Палестинци се додадени на билансот на убиени по проверката на нивните податоци од релевантните власти.
Договорот за прекин на огнот е во сила во Газа од 19 јануари, со што е запрена израелската војна која предизвика опсежно разорување и ја остави палестинската енклава во урнатини.
Меѓународниот кривичен суд во ноември минатата година издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.
Израел се соочува и со случај за геноцид пред Меѓународниот суд на правдата за неговите постапки во енклавата.
