Трамп прогласи „целосна победа“ по прекинот на огнот во Иран

Американскиот претседател Доналд Трамп изјави дека Соединетите Американски Држави (САД) ги постигнале сите свои воени цели во Иран и ја опиша ситуацијата како „целосна победа“ по воспоставениот прекин на огнот, објави „Скај њуз“, пренесува Анадолу.

Во краток телефонски разговор за овој медиум, Трамп рече дека прекинот на огнот е „прилично добар“ и повтори дека целите на САД се исполнети.

„На воен план, направивме сè што сакавме да направиме“, изјави тој.

Трамп исто така посочи дека планот од 10 точки предложен од Техеран се чини дека обезбедува основа за преговори.

„Тоа се многу добри точки, а за повеќето од нив преговорите се веќе целосно завршени“, рече тој, додавајќи дека не би ги опишал барањата на Иран како „максималистички“.

Трамп нагласи дека доколку прекинот на огнот и преговорите „не бидат добри“, многу лесно ќе се вратат на ситуацијата од претходно.