Трамп со критики кон НАТО за одбивањето да помогне во повторно отворање на Ормускиот Теснец

ВАШИНГТОН (АА) – Американскиот претседател Доналд Трамп денес упати остра критика кон НАТО, велејќи дека трансатлантската алијанса е „хартиен тигар“ без САД и остро критикувајќи го одбивањето на сојузниците да му помогнат во напорите за повторно отворање на Ормускиот Теснец, пренесува Анадолу.

„Тие не сакаа да се приклучат на борбата за запирање на нуклеарен Иран. Сега кога борбата е воено добиена, со многу мала опасност за нив, тие се жалат на високите цени на нафтата што се принудени да ги плаќаат, но не сакаат да помогнат во отворањето на Ормускиот Теснец, едноставен воен маневар што е единствената причина за високите цени на нафтата“, рече тој на својата платформа „Truth Social“.

„Толку лесно им е да го направат тоа, со толку мал ризик. Кукавици, ние нема да го заборавиме ова!“, додаде тој.

Регионалните тензии на Блискиот Исток ескалираа откако Израел и САД започнаа заедничка офанзива врз Иран на 28 февруари, во која досега загинаа околу 1.300 луѓе, меѓу кои и тогашниот врховен лидер Али Хамнеи.

Иран возврати со напади со беспилотни летала и ракети низ целиот регион и го затвори Ормускиот Теснец за поголемиот дел од комерцијалниот сообраќај, клучна транзитна рута за нафта низ кој минуваат околу 20 милиони барели дневно и приближно 20% од глобалната трговија со течен природен гас.