Тринаесет земји потпишаа заедничко писмо во кое го предупредуваат Израел за големата офанзива во Рафа

БЕРЛИН (АА) - Повеќе од десетина земји пратија заедничко писмо до Израел, предупредувајќи го за големата копнена офанзива во најјужниот град во Газа, Рафа, објавија медиумите денес, пренесува Анадолу.

Заедничкото писмо, потпишано од министрите за надворешни работи на 13 земји, вклучително и големи економии и демократии, беше пратено до израелската Влада во средата, во кое се бара да дозволи непречен хуманитарен пристап до опколената палестинска територија.

Писмото беше потпишано од земјите на Г7, Канада, Германија, Франција, Италија, Јапонија и Велика Британија, како и Австралија, Данска, Финска, Холандија, Нов Зеланд, Јужна Кореја и Шведска, објави германскиот весник „Суддојче цајтунг“.

Во писмото од четири страници министрите ја потврдија својата поддршка за правото на Израел на самоодбрана против палестинската група Хамас, но исто така предупредија поради големата воена офанзива врз Рафа, нагласувајќи дека тоа ќе има „катастрофални“ последици врз цивилите.

Тие, исто така, нагласија дека израелската Влада мора да направи сѐ што е во нејзина моќ за да ја ублажи катастрофалната и влошена хуманитарна криза во Појасот Газа. Министрите побараа Израел да ги отвори сите гранични премини, вклучително и преминот Рафа, за да обезбеди испорака на итно потребната хуманитарна помош за палестинските цивили.

Во писмото, исто така, се бара од израелските власти да им дозволат пристап на меѓународните хуманитарни организации, како и на агенцијата на ОН за палестинските бегалци (УНРВА) во Газа, да ја осигурат безбедноста на хуманитарните работници и меѓународниот персонал и да дадат доволно дозволи за локалните возачи на камиони.