Украина: По уривањето на браната „Каховка“ нивото на водата во Херсон се зголеми за 5,5 метри

КИЕВ (АА) - По уривањето на браната „Каховка“ во Украина нивото на водата во населените места под браната се зголеми за 5,5 метри, пренесува Анадолу.

Владимир Демчук, заменик-шеф на Државната служба за вонредни состојби на Украина, за локален телевизиски канал говореше за ситуацијата во регионот по уривањето на браната „Каховка“.

Наведувајќи дека сè уште се зголемува нивото на водата, но со намалена стапка, Демчук рече: „Нивото на водата во градот Херсон се зголеми за 5,5 метри по уривањето на браната.“

Соопштувајќи дека 20 населени места на десниот брег на реката Днепар, кој е под контрола на Украина, се под вода, Демчук рече дека од регионот се евакуирани над 1.900 луѓе, од кои 103 деца.

Шефот на воената администрација на регионот Херсон, Александар Прокудин, на својот профил на социјалните мрежи објави видео во кое истакна дека 600 квадратни километри од регионот Херсон се под вода, од кои „32 % од земјата се на десниот брег на Днепар и 68 % се на левиот брег“.

Во соопштението на социјалните мрежи на украинската Државна служба за вонредни состојби се наведува дека во регионот се формирани девет центри за евакуација. Објавен е и податок дека на десниот брег на реката се поплавени вкупно 20 населени места и 2.629 куќи.

- „Нивото на водата во браната се намали 1 метар за еден ден“ -

Од друга страна, украинската организација на хидроцентрали „Ukrgidroenergo“, на својот профил на социјалните мрежи објави дека нивото на водата во браната „Каховка“ продолжува да се намалува.

Информирајќи дека заклучно со 08:00 часот по локално време, нивото на водата во градот Никопол, кој се наоѓа во близина на браната, изнесува 13 метри, во соопштението се вели: „Нивото на водата на браната Каховка се намали за речиси 1 метар за еден ден“.

Во соопштението се наведува дека се работи на различни сценарија за да се постигне порамномерно работење на енергетскиот систем.