МАРИБ (АА) – Хусите во Јемен денес објавија дека собориле американско беспилотно летало над североисточниот дел на земјата, во услови на продолжени судири со САД, јавува Анадолу.

Портпаролот на военото крило на Хусите, Јахја Сари, изјави дека беспилотното летало од типот МКЈУ-9 било соборено додека „вршело непријателски мисии“ над провинцијата Ал Џауф.

„Леталото беше погодено со домашно произведена ракета земја-воздух,“ рече Сари.

Тој додаде дека ова е трето беспилотно летало што е соборено последните десет дена и осумнаесетто откако групата започна воени операции во знак на поддршка за Газа после, како што ја нарекоа, „геноцидната војна“ на Израел против палестинската енклава во октомври 2023 година.

Од САД засега нема официјален коментар за ова тврдење.

Сари, исто така, рече дека американските воздушни напади продолжуваат во повеќе делови на Јемен, при што има жртви меѓу цивилите.

Министерството за здравство под контрола на Хусите соопшти дека осум лица загинале, а 16 се повредени во американскиот воздушен напад врз областа Ал-Хавак во крајбрежната провинција Ал-Худејда.

Телевизијата Ал-Масира, управувана од Хусите, објави дека во американските напади биле погодени комуникациските мрежи во провинциите Иб и Амран во северниот дел на земјата.

Според податоците на Министерството, во американските напади врз Јемен од 15 март досега убиени се најмалку 78 цивили, а 196 се повредени.

Минатиот месец американскиот претседател Доналд Трамп изјави дека наредил „решителна и моќна воена акција“ против Хусите и подоцна се закани дека ќе ги „уништи целосно“.

Од ноември 2023 година Хусите извршуваат напади врз бродови што минуваат низ Црвеното Море, Арапското Море, Баб ел-Мандеб и Аденскиот Залив, во знак на солидарност со Палестинците во Појасот Газа, каде што, според нив, Израел убил над 50.800 луѓе.

Групата ги прекина нападите откако во јануари беше прогласен прекин на огнот во Газа меѓу Израел и палестинската група Хамас, но повторно започна со офанзива по обновените израелски воздушни напади врз Газа минатиот месец.