Чавушоглу за анексијата на Крим: „Меѓународната заедница мора да е едногласна против ова кршење на меѓународното право“

АНКАРА

Министерот за надворешни работи на Турција, Мевлут Чавушоглу, истакнувајќи дека Турција силно го поддржува територијалниот интегритет на Украина, рече: „Меѓународната заедница треба да биде едногласна против кршењето на меѓународното право (илегалната анексија на Крим)“, јавува Агенција Анадолија (АА).

Во својот говор на Самитот за воспоставување на платформата на Крим во Украина, Чавушоглу ја честиташе 30-годишнината од независноста на Украина.

Потсетувајќи дека поминале повеќе од 7 години од илегалната анексија на Крим, Чавушоглу рече: „Нашата поддршка за територијалниот интегритет на Украина е многу силна. Меѓународната заедница мора да биде едногласна против ова кршење на меѓународното право.“

„Веруваме дека Кримската платформа ќе послужи како ефективен форум за да ја покажеме нашата солидарност и посветеност“, рече Чавушоглу.

Тој додаде дека Кримската платформа не е само за регионот, туку и за народот.

Потсетувајќи дека во Украина живее голема татарска заедница и дека Турција е дом на милиони граѓани со татарско потекло, Чавушоглу нагласи:

„Големиот татарски интелектуалец, Исмаил Гаспиралим, еднаш рече: ‘Лесно е да паднеш, но тешко е повторно да застанеш на нозе.‘ Татарите ги надминаа сите тешкотии низ историјата. Му благодариме на претседателот на Украина (Владимир) Зеленски за неговите напори заедно со Парламентот да ги признае Кримските Татари како домороден народ на Украина.“

- „Платформата треба да послужи за подигнување на глобалната свест за Крим“

Изразувајќи надеж дека Кримската платформа ќе соработува тесно со Кримско-татарското собрание, Чавушоглу рече: „Оваа платформа треба да послужи за подигнување на глобалната свест за Крим.“

Посочувајќи дека воспоставувањето на меѓупарламентарните контакти, ефикасното информирање на јавноста и одржувањето состаноци на меѓународно експертско ниво ќе додадат вредност на работата на Платформата, Чавушоглу додаде:

„Во сегашните околности не постои лесно решение за овој проблем (илегална анексија на Крим). За жал, меѓународниот систем, вклучително и механизмот на Обединетите нации, не е добро дизајниран за да може да го реши. Сè уште единствениот пат за мирно решение е дипломатијата. Затоа е потребна активна координација. Оваа платформа означува важен почеток во координирањето на нашите напори за да можеме да постигнеме мирно и долгорочно решение. Крим е Украина.“