Шест припадници на милитантните сили на Хафтар се предадоа на либиската војска

ТРИПОЛИ

Шест припадници на нелегитимните милитантни сили кои ги предводи Калифа Хафтар денеска се предадоа на либиската армија во воздушната база „Ватија“, соопшти прес-центарот на операцијата „Вулкан на гневот“, која ја води Владата на национално единство, јавува Агенција Анадолија (АА).

Воздушната база „Ватија“ е клучна база во Либија која милитантните на Хафтар ја окупираа во 2014 година.

Токму таа база Хафтар ја користи како засолниште од кое раководи со нападите на Триполи и другите либиски региони.

Либија е средиште на длабока политичка и безбедносна криза уште од 2011 година, кога Моамер ал Гадафи беше соборен од власт и убиен.

Владата на национално единство на Либија со седиште во Триполи, ужива поддршка од Обединетите нации и меѓународната заедница, додека Хафтар од Тобрук ги предводи нелегитимните сили кои главно ги поддржуваат Египет и Обединетите Арапски Емирати (ОАЕ).