Шефовите на дипломатиите на Туркије и ОАЕ разговараа за хуманитарната состојба во Газа

ИСТАНБУЛ (АА) – Турскиот министер за надворешни работи Хакан Фидан телефонски разговараше со својот колега од Обединетите Арапски Емирати во врска со хуманитарната ситуација во Газа, соопштија турски дипломатски извори, пренесува Анадолу.

За време на телефонскиот разговор меѓу Хакан Фидан и шеикот Абдула бин Зајед Ал Нахајан „беше разговарано за хуманитарната ситуација во Газа во контекст на неодамнешните случувања во Израел и Палестина“, рекоа изворите.

Израелско-палестинскиот конфликт ескалира во хуманитарна криза на 7 октомври, кога вооруженото крило на Хамас, бригадите Ал-Касам, ја започна операцијата „Поплава Ал Акса“ против Израел, повеќестран ненадеен напад што вклучуваше низа ракетни лансирања и инфилтрации во Израел преку копно, море и воздух.

Хамас рече дека операцијата е одмазда за упадот во џамијата „Ал Акса“ во окупираниот Источен Кудс (Ерусалим) и зголеменото насилство на еврејски доселеници врз Палестинците.

Како одговор, израелската војска ја започна операцијата „Железни мечеви“ против позиции на Хамас во Појасот Газа.

Одговорот на Израел се прошири и на прекинување на снабдувањето со вода и електрична енергија на Газа, дополнително влошувајќи ги условите за живот во областа што е под опсада од 2007 година.