Шпанија ги осуди израелските изјави за наводните планови за напад врз либанската цивилна инфраструктура

ЖЕНЕВА (АА) – Шпанија денес упати најостра осуда до израелските власти поради изјавите за наводни воени планови чија цел се инфраструктурата и цивилните подрачја во Либан, јавува Анадолу.

„Шпанската Влада го изразува својот најсилен прекор кон изјавите на израелските власти во кои се тврди дека на израелската војска ѝ е наредено да ги уништи сите мостови на реката Литани, како и домовите на либанските цивили во соседните села. Ова претставува флагрантно и со умисла извршено прекршување на меѓународното хуманитарно право“, се вели во соопштението на Министерството за надворешни работи на Шпанија.

Од Министерството нагласија дека цивилната инфраструктура, вклучувајќи ги домовите и здравствените установи, „според меѓународното право, никогаш не може да се смета за воена цел“.

Во соопштението се додава дека „таквите дејствија ги прекршуваат најосновните принципи на меѓународното хуманитарно право, уништувајќи ги животите на невини цивили“.

Шпанското МНР исто така предупреди на какви било потези што би можеле да влијаат врз територијалното единство на Либан.

„Шпанија категорично ја повторува својата осуда за секој обид за изолација и поделба на либанската територија и повикува на почитување на територијалниот интегритет и суверенитет на Либан“, се наведува во соопштението.

Мадрид дополнително упати апел до меѓународната заедница да спречи „неказнивост за овие дејствија“ и да ја зајакне поддршката за напорите на либанската Влада за консолидирање на суверенитетот и територијалниот интегритет под нејзина надлежност.