Шумски пожар во Југозападна Франција се прошири на 1.100 хектари, евакуирани 500 лица

Шумскиот пожар што беснее во францускиот департман Ланд, во југозападниот дел на земјата, до синоќа зафатил 1.100 хектари, поради што биле евакуирани околу 500 лица, објави денес телевизијата БФМТВ, јавува Анадолу.

Префектурата на Ланд соопшти дека пожарот, кој избувнал вчера, се проширил на 1.100 хектари, а досега не се зафатени домови.

Биле евакуирани вкупно 525 лица, а околу 500 пожарникари останале распоредени на местото на пожарот.

На новинарите префектот им изјави дека пожарот забавил, но дека следните 15 часа ќе бидат одлучувачки.

Во северозападниот департман Ил-е-Вилен, поради пожарот во општината Сен-Жист, распоредени се повеќе од 300 пожарникари.

Метео-Франс стави четири департмани – Ендр, Ендр-е-Лоар, Мајен и Де-Севр – под црвено предупредување поради „многу висок“ ризик од шумски пожари.

Во меѓувреме, 57 департмани останаа под портокалово предупредување поради „висок“ ризик од шумски пожари.

Националната метеоролошка служба, исто така, стави 75 департмани под портокалово предупредување за топлотен бран, со очекувани температури меѓу 38 и 40 Целзиусови степени.