Јеменскиот премиер: „Педесет отсто од јеменските деца страдаат од хронична неисхранетост“

САНА (АА) - Јеменскиот премиер Ахмед Авад бин Мубарак објави дека 50 отсто од децата во земјата страдаат од хронична неисхранетост, пренесува Анадолу.

Тој ја даде изјавата за време на настанот во Аден по повод одбележувањето на Светскиот ден на населението, јави државната јеменска новинска агенција Саба.

Бин Мубарак нагласи дека визијата на неговата Влада се фокусира на луѓето како најважен ресурс во кој треба да се инвестира и да се унапреди преку посветени услуги и програми и покрај значителните предизвици и финансиските и економските притисоци со кои се соочува земјата.

Тој истакна дека меѓу предизвиците со кои се соочува Владата е тоа што 45 отсто од населението е помладо од 16 години, 65 отсто е работоспособно, додека 50 отсто од децата во земјата страдаат од хронична неисхранетост, а 21 отсто не се развиени правилно како резултат на тоа.

Бин Мубарак нагласи дека за сериозноста на овие бројки е потребен сериозен ангажман, високо ниво на одговорност и нивно приоритизирање во сите планови, програми и трошења.

Тој, исто така, ги истакна финансиските и економските притисоци со кои се соочува Владата во справувањето со овие предизвици поради тековната војна што ја водат Хусите, која го лишила јеменскиот народ да има корист од своите ресурси, објави агенцијата.

Според претходните извештаи на Обединетите нации (ОН), во Јемен има околу 32 милиони жители, а на поголем дел му е потребна хуманитарна помош.

Јемен се соочува со тешка економска криза влошена со прекинот на извозот на нафта во октомври 2022 година поради нападите на Хусите врз нафтените пристаништа во областите под контрола на Владата.

Повеќе од две години Јемен доживува затишје во војната што започна пред речиси 10 години меѓу владините сили поддржани од арапската воена коалиција предводена од Саудиска Арабија и силите на Хусите поддржани од Иран, кои ги контролираат провинциите и градовите, вклучително и главниот град Сана од септември 2014 година.