Босански спортист го заврши своето патување до Истанбул за поддршка на пациентка болна од рак

ИСТАНБУЛ (АА) - Босанскиот спортист Фарук Суљовиќ пристигнувајќи во Истанбул го заврши своето патување, кое го започна од својата земја за да ја поддржи терапијата на Анелија Смајиќ, пациентка која боледува од рак, мајка на три деца, известува Анадолу.

Атлетичарот Суљовиќ, кој тргнал како дел од кампањата организирана од хуманитарната организација „Помози.ба“ во Сараево, главниот град на Босна и Херцеговина (БиХ), за да ѝ обезбеди лекови на Смајиќ, пристигна до Аја Софија во Истанбул возејќи велосипед и трчајќи.

Изјавувајќи за дописникот на Анадолу дека имал заморно патување до Истанбул, Суљовиќ истакна: „Тргнав од Сараево пред 8 дена. Возев велосипед 1.000 километри. Трчав 200 километри. Ова го направив ова за кампања за помош. Анелија Смајиќ, мајка на 3 деца што живее во Босна и Херцеговина, е болна од рак и за лекување има потреба од 4.000 евра месечно. Јас сум тука за неа. Сакам да ѝ кажам нешто; ‘Анелија, успеавме’. Досега за оваа кампања собравме речиси 15.000 евра. Нашата кампања за помош ќе продолжи до 10 мај.“

Нагласувајќи дека Амра Џеко, сопругата на босанско-херцеговскиот фудбалер Един Џеко, кој игра за Фенербахче, е амбасадор на кампањата за помош, Суљовиќ истакна:

„Со Амра се сретнав два часа пред да стигнеме до Аја Софија. И таа трчаше со мене некое време. Снимивме неколку снимки за документарецот што ќе го подготвиме. Беше одлично искуство. Таа нè поддржа и со објавите на своите профили на социјалните мрежи. Амра Џеко даде многу голем придонес во овој проект.“

Велејќи дека е многу уморен и гладен, Фарук Суљовиќ продолжи со зборовите:

„Сакам што поскоро да јадам турски донер. Ќе се одморам малку. Би сакал и вам многу да ви се заблагодарам за укажаната поддршка.“