Beril Çanakcı
29 Септември 2026•Ажурирано: 29 Септември 2026
ФИФА ја обвини УЕФА за спроведување „кампања со дезинформации“ и за обид да влијае врз претстојните претседателски избори, среде ескалирачкиот правен спор околу напуштениот проект ФИФА форвард ентерпрјс (ФФЕ), јавува Анадолу.
Во поднесокот доставен вчера до Окружниот суд на САД за Јужниот округ на Флорида, ФИФА се спротивстави на барањето на УЕФА за обелоденување докази и документи поврзани со проектот.
Управното тело на европскиот фудбал го обвини претседателот на ФИФА, Џани Инфантино, за „криминално лошо управување“ и за промовирање на она што го нарече „измамничка цена надвор од пазарните услови“ за сопствена корист, во врска со предлогот за ФФЕ.
Во својот одговор, ФИФА наведе дека поднесокот на УЕФА содржи „многубројни лажни или погрешни изјави за ФИФА и за Инфантино“.
„Без каква било основа УЕФА сугерира дека г. Инфантино се обидел лично да профитира од предлогот за ФФЕ“, соопшти ФИФА, според извештајот на Би-би-си.
„Тврдењата на УЕФА дека г. Инфантино прекршил каков било закон или етички принцип се категорично неосновани.“
ФИФА, исто така, го опиша барањето на УЕФА за документи како „апсурдно претерано“ и истакна дека судовите веќе отфрлиле слични барања.
Предлогот за ФФЕ беше ставен во мирување по силните реакции и противењето на јавноста. УЕФА беше еден од главните критичари на Инфантино во врска со овој проект, а се упатуваа и повици тој да се повлече од функцијата.
Вчера „Атлетик“ објави дека Инфантино изразил поддршка за распределба на повеќе средства на националните сојузи членки од резервите на ФИФА што изнесуваат 6 милијарди долари.
Според објавеното, Инфантино им соопштил на претседателите на шесте континентални конфедерации на ФИФА дека предлозите за дополнително финансирање ќе бидат разгледани од Советот на ФИФА на состанокот закажан за 15 октомври.
Се очекува првиот човек на ФИФА да се кандидира за нов мандат како претседател во март 2027 година, при што потенцијалните противкандидати имаат рок до 18 ноември да влезат во трката.
