Ердоган: Туркије ќе го извезува автохтониот електричен автомобил Тогг од 2025 година

БУРСА (АА) – Туркије ќе започне со извоз на својот прв автохтон електричен автомобил Тогг од 2025 година, изјави денес турскиот претседател Реџеп Таип Ердоган, јавува Анадолу.

„Од 2025 година, ќе го извезуваме Тогг и ќе го продаваме во светот“, рече Ердоган на церемонијата за поставување на камен темелник на фабриката за развој и производство на батерии СИРО, во северозападната индустриска област Бурса.

Ердоган додаде дека целта е оваа година да се испорачаат 28.000 возила Тогг и вкупно еден милион до 2030 година.

„Со националните возила на патиштата, нашата држава сега има автомобил и бренд што може да им конкурира на најдобрите во светот“, рече Ердоган, додавајќи дека братските земји, исто така, го побарале Тогг од Туркије.

На почетокот на април, Тогг излезе на асфалтот по свечената испорака на Ердоган, кој рече дека Тогг го достигнал сегашното ниво како симбол на технолошкиот напредок, економскиот развој и глобалната репутација на Туркије.

Во врска со новата фабрика за батерии во округот Гемлик, Ердоган рече дека првото производство ќе започне во 2024 година.

„Денес, со огромна инвестиција, преземаме уште еден чекор што ќе ѝ помогне на Туркије да стане силен играч во технологијата на батерии“, рече турскиот претседател.

Како што истакна, од 2026 година овој кампус ќе стане интегриран центар кој произведува модули и батерии со висока содржина на никел, вклучително и батериски ќелии.

„Имаме цел Туркије да стане производствена база на Европа во технологијата на полначи и батерии, како и електрични возила“, нагласи Ердоган.