Лицето кое ја постави бомбата во Истанбул призна дека нападот го наредиле терористи на ПКК кои се наоѓаат во Сирија

ИСТАНБУЛ (АА) - Сторителката на смртоносниот терористички напад на познатата улица за пешачење Истиклал во Истанбул ја зела наредбата од терористичката организација ЈПГ/ПКК во Сирија, соопштија денес турските власти, јавува Агенција Анадолија (АА).

На снимките преземени од 1.200 надзорни камери може да се види каде терористката се движела пред да пристигне на Таксим за да ја остави бомбата, за потоа со такси да замине од местото на нападот во областа Есенлер во Истанбул, соопшти полициската управа во Истанбул.

Полицијата извршила рација на 21 адреса по лицата за кои било откриено дека биле во контакт со сторителката на терористичкиот напад на Таксим, се додава во соопштението.

„За време на операцијата, фатени се и приведени 46 лица, а откриено e дека лицето што ја оставило бомбата заминало на адреса во областа Кучукчекмеџе“, се вели во соопштението.

Ахлам Албашир, сириска државјанка која го изврши нападот, беше фатена на нејзината адреса во 2.50 часот по локално време ова утро.

Во нејзиното полициско испрашување, осомничената рече дека била обучена како специјален разузнавач од терористичката организација ПКК/ПЈД/ЈПГ и дека илегално влегла во Туркије преку сирискиот Африн.

Терористката признала дека бомбашкиот напад го извршила околу 16.20 часот по локално време во неделата, преземајќи наредба за акција од штабот на терористичката организација ПКК/ПЈД/ЈПГ во Кобане, Сирија.

Министерот за внатрешни работи Сулејман Сојлу претходно денес изјави дека е приведен сторителот кој ја оставил бомбата на преполната улица која е честа дестинација на купувачите и туристите.

Светските лидери го осудија терористичкиот напад на улицата Истиклал во Истанбул во кој загинаа најмалку шест лица, а 81 беа повредени.