Туркије го осуди планот на Израел за изградба на нови нелегални населби на Западниот Брег

ИСТАНБУЛ (АА) - Туркије вчера силно ја осуди израелската одлука со која се одобрува изградба на 3.500 станбени единици на окупираниот Западен Брег, осудувајќи го овој потег како „понатамошна експанзија и окупација на палестинските територии“, јавува Анадолу.

„Планот што израелските власти го одобрија на 6 март за изградба на 3.500 станбени единици на Западниот Брег претставува окупирање на нови територии на палестинската земја“, рече Онџу Кечели, портпаролот на турското Министерство за надворешни работи.

„Оваа постапка мора веднаш да биде запрена“, нагласи Кечели, истакнувајќи ја потребата израелските злосторства јасно да се дефинираат за да се спречи понатамошно кршење на меѓународното право.

„Во таа насока, не е доволно меѓународната заедница да ги нарекува 'илегални населби' окупаторските активности на Западниот Брег. Станува збор за израелска насилна конфискација на територија која легално му припаѓа на палестинскиот народ“, истакна Кечели.

Врховниот совет за планирање на Израел во средата го одобри планот за изградба на 3.500 станбени единици на окупираниот Западен Брег.

Новите домови ќе бидат изградени на Западниот Брег, во населбите Мале Адумим, Ефрат и Кедар.

„Државата Израел ќе продолжи да расте и да се развива на сите полиња, а населбите, исто така, ќе продолжат да растат, да напредуваат и да цветаат“, соопшти министерот Безалел Смотрич.

„Оваа година направивме многу нешта за населбите. Со одобрение за станбените населби, промовираме серија населби, премер на земјиште, безбедност, патишта и други најави во Јудеја и Самарија (Западен Брег) во невидени размери“, додаде министерот Смотрич.

Според палестинските извори, околу 725.000 доселеници живеат во 176 еврејски населби и 186 места на окупираниот Западен Брег.

Меѓународното право ги смета сите еврејски населби на окупираните територии за нелегални.