ИГДИР
Турски универзитет ќе спроведе истражување за да го открие видот на животното чиј скелет беше пронајден од страна на работници додека копале во дворот на една фабрика во источна Турција, јавува Агенција Анадолија (АА).
Минатата недела, додека копале во дворот на стара фабрика за предење во источната турска област Игдир, работниците откриле комплетен скелет на животно високо речиси еден метар, со заби на предатор.
Откако забележале дека некои ткива на скелетот не се распаднати, работниците ја пријавиле ситуацијата на професорите во Центарот за примена и истражување на биодиверзитетот на Универзитетот во Игдир.
Професорите кои дојдоа во реонот каде што се вршело ископувањето, го зедоа скелетот и го однесоа на Универзитетот за дополнителни испитувања.
Белкис Муџа Јигит, предавач на Универзитетот во Игдир, за АА изјави дека тие ќе се обидат да го откријат видот на животното по испитувањето.
„Потоа ќе се погрижиме овој скелет да биде сочуван во музејот“, додаде Јигит.
Раководителот Јусуф Китај рече дека работниците го пронашле скелетот додека работеле во реон кој не бил користен во последните 30-40 години.
„Обликот на скелетот го привлече вниманието на работниците и тие ја пријавија ситуацијата на властите“, рече Китај, додавајќи: „Ние особено забележавме дека неговите задни екстремитети се долги. Ги информиравме властите дека можеби се работи за интересен вид, бидејќи неговите стапала немаат копита туку нокти, и исто така има остри заби.“
„Истражувањето ќе биде спроведено, и ние, исто така сме љубопитни. Се надевам дека нешто интересно ќе се открие што ќе биде корисно за науката“, додаде тој.
