Турскиот брод за сондажа пристигна во Сомалија, прва ваква мисија во странство

Турски брод за сондажа пристигна во Сомалија, означувајќи ја првата ваква мисија на Турција во странство, соопшти денес турскиот министер за енергетика и природни ресурси, Алпарслан Бајрактар, пренесува Анадолу.

„Бродот ’Чагри Беј‘ пристигна во Сомалија за својата историска мисија“, објави Бајрактар на турската платформа за социјални медиуми NSosyal, додавајќи дека операцијата ќе отвори „сосема ново поглавје во историјата на енергетиката на Турција и на Сомалија“.

Тој истакна дека Турција ја започнува својата прва мисија во странство за сондажа во длабоко море, додавајќи: „Бараме божја помош за нашата прва сондажа во длабоко море што е надвор од нашите граници.“

Според турското Министерство за енергетика, предвидено е „Чагри Беј“ да врши сондажа во бунарот „Курад-1“ во водите на Сомалија, а се очекува да оперира на длабочина од 7.500 метри во период од 288 дена.

Претходно овој месец Бајрактар изјави дека бродот ќе пристигне во Сомалија денес и дека со него Турција ќе ја започне својата прва офшор операција за сондажа во водите на оваа земја од Рогот на Африка.