Турскиот закон за процесот „Турција без тероризам“ објавен во Службен весник

Законот со кој се воспоставува правната рамка за процесот „Турција без тероризам“ беше објавен денес во Службениот весник, со што официјално стапија во сила мерките усвоени од Парламентот претходно овој месец, јавува Анадолу.

Законот за зајакнување на националната солидарност и општествената кохезија ги утврдува процедурите за суспендирање на истрагите, судските постапки и извршувањето на одредени казни поврзани со терористичката организација ПКК/КЏК и нејзините поврзани групи, откако безбедносните институции ќе потврдат дека групата ги прекинала своите активности и го предала оружјето и муницијата под нејзина контрола, а Советот за национална безбедност ќе донесе одлука со која се потврдува тоа и таа одлука ќе биде објавена во Службениот весник.

Законот предвидува суспендирање на судските постапки во период од пет години за кривични дела за кои е предвидена затворска казна до 15 години, а во период од 10 години за потешки кривични дела. Од ова се исклучени одредени тешки кривични дела, меѓу кои и намерното убиство извршено како дел од терористички активности.

Законот опфаќа кривични дела поврзани со основање или раководење со ПКК/КЏК, членство во организацијата, свесно и намерно помагање на организацијата и пропагандни активности, како и кривични дела извршени во рамките на активностите на организацијата и кривични дела поврзани со финансирање на тероризам извршени во нејзино име.

Доколку лице изврши ново кривично дело поврзано со тероризам за време на периодот на суспензија, суспензијата ќе биде укината, а соодветната правна постапка или извршувањето на казната ќе продолжи. Доколку во предвидениот период не биде извршено такво кривично дело, соодветната постапка може да биде прекината или казната да се смета за издржана согласно со законот.

Законодавството предвидува и процедури за регистрирање на оружје, муниција, експлозиви, возила и друг материјал предаден или пријавен од членовите на организациите опфатени со законот.

Турскиот претседател Реџеп Таип Ердоган минатата недела го опиша усвојувањето на законодавството во Парламентот како „важен чекор“ во процесот „Турција без тероризам“, велејќи дека Владата ќе работи трпеливо и решително за да ја ослободи земјата од тероризмот „засекогаш“.