Турскиот министер Фидан повика на дипломатија на трилатералниот состанок во Истанбул

ИСТАНБУЛ (АА) - Турскиот министер за надворешни работи Хакан Фидан повика на обновена посветеност на дипломатијата на трилатералниот состанок Турција - Русија - Украина за мир меѓу Русија и Украина во Истанбул, јавува Анадолу.

„Мора да ја искористиме оваа можност за да напредуваме по патот до мирот“, изјави Фидан во својот воведен говор, обраќајќи се пред делегациите од Русија и Украина, како и пред турските посредници.

„Задоволни сме што гледаме дека цврстите заложби отворија нов прозорец на можности пред нас. Оваа средба го означува првиот директен контакт на високо ниво меѓу страните од март 2022 година“, додаде Фидан.

Преговорите се одржуваат во Претседателската канцеларија „Долмабахче“ во Истанбул, а делегациите од двете земји присуствуваат по неодамнешната посета на украинскиот претседател Владимир Зеленски на Анкара.

- „Силната волја на Анкара да ја заврши војната“ -

Фидан, исто така, ја нагласи централната улога на Турција во олеснувањето на дијалогот и ги повика двете страни да ја искористат, како што ја нарече, историската можност.

„Сметаме дека е многу важно што повиците за мир на господин (претседателот Реџеп Таип) Ердоган и господин (претседателот Доналд) Трамп беа послушани од господин (претседателот Владимир) Путин и господин (претседателот Владимир) Зеленски.“

„Како што ќе сфатите, сега стигнавме до точка каде што постојат две патеки. Едната од овие патеки ќе нè одведе до мир со почеток на нов процес. Другата ќе доведе до поголемо уништување и загуби на животи.“

Тој истакна дека Турција интензивно работи од почетокот на конфликтот за да ги доведе завојуваните страни на преговарачка маса. Угостувањето на руските и украинските претставници во Истанбул, рече тој, ја одразува „силната волја на Анкара да ја заврши војната“.

Со оглед на тоа што цивилните жртви продолжуваат да се зголемуваат, Фидан ја нагласи итноста од постигнување итен прекин на огнот: „Додека војната продолжува да одзема животи, од клучно значење е што поскоро да се спроведе прекин на огнот“.

Тој, исто така, повика на конструктивен пристап што би можел да го отвори патот за иден самит меѓу лидерите.

„Следната фаза ќе биде одредена колективно преку изборите што ќе ги направиме и чекорите што ќе ги преземеме“, додаде тој.

„Искрено веруваме дека е можно да се постигне мир преку конструктивни преговори.“

Завршувајќи го својот говор, Фидан ја повтори подготвеноста на Турција да придонесе во мировниот процес, велејќи дека Турција секогаш ќе ги поддржува „напорите за завршување на војната и воспоставување мир“.

„Подготвени сме да понудиме секаков можен придонес за мирот“, нагласи тој.