Dzihat Aliju
05 maj 2025•Përditësim: 06 maj 2025
Në kryeqytetin e Maqedonisë së Veriut, Shkup, Agjencia Turke për Bashkëpunim dhe Koordinim (TIKA) mbajti ceremonitë e hapjes së projekteve për krijimin e hapësirave të reja arsimore në Shkollën Fillore "Jashar Bej Shkupi", riparimin dhe pajisjen e klasave të mësimit në gjuhën turke të Fakultetit Pedagogjik Shën Klimenti i Ohrit pranë Universitetit "Shën Kirili dhe Metodi", raporton Anadolu.
Në ceremonitë e mbajtura veçmas në dy institucione arsimore morën pjesë ambasadori i Türkiyes në Shkup, Fatih Ulusoy, nënkryetari i TIKA-s, Mahmut Çevik, deputetë dhe politikanë turq të Maqedonisë së Veriut, përfaqësues të institucioneve arsimore, akademikë dhe studentë.
Në deklaratën e tij për gazetarët, ambasadori Ulusoy kujtoi se Türkiye vazhdon aktivitetet e saj në Maqedoninë e Veriut me shumë institucione të saj dhe tha se TIKA ka ndërmarrë projekte shumë të rëndësishme.
Ulusoy theksoi se me nënkryetarin e TIKA-s, Çevik vizituan vende të ndryshme në Maqedoninë e Veriut për tre ditë dhe mbajtën disa hapje me këtë rast. Ai shtoi se TIKA ka zbatuar shumë projekte që prekin jetën e njerëzve, nga kultura te turizmi, nga bujqësia te arsimi.
Ai potencoi se projektet e përuruara sot kontribuojnë si në infrastrukturën arsimore të vendit ashtu edhe në cilësinë dhe standardin e arsimit. "Ky është kontribut që ka rezultate për luftën e vendit kundër migracionit. Ne e vlerësojmë dhe kujdesemi shumë për këtë. Ne i kushtojmë shumë rëndësi aktiviteteve të TIKA-s sonë këtu. Këto përpjekje do të vazhdojnë në shumë fusha", tha Ulusoy.
- TIKA realizoi afro 400 projekte arsimore në Maqedoninë e Veriut
Çevik kujtoi se deri më sot kanë zbatuar afro 400 projekte arsimore në Maqedoninë e Veriut. Ai theksoi se filozofia themelore e investimeve të tyre në fushën e arsimit është "të sigurojnë që nxënësit të marrin arsim dhe të fitojnë përvojë në shkolla me kushte më të mira, më të shëndetshme dhe më fizike".
"Sot kemi ofruar mundësinë për rishikimin dhe krijimin e klasave të gjuhës shqipe, maqedone dhe turke në Shkollën Fillore 'Jashar Bej Shkupi' dhe që nxënësit e këtyre tre komuniteteve të marrin arsim në klasa me kushte fizike cilësore. Sot kemi zbatuar edhe një projekt që do t'u lejojë mësuesve në Fakultetin e Pedagogjisë, të cilët kontribuojnë në arsimimin e këtyre nxënësve, të zhvillojnë arsim në klasa me kushte të mira fizike dhe ne i kemi mbështetur ata me pajisje dhe materiale duke rinovuar dy klasa", deklaroi nënkryetari i TIKA-s, Çevik.
Dekanja e Fakultetit Pedagogjik "Shën Klimenti i Ohrit", Biljana Kamçevska shprehu kënaqësinë e saj për mbështetjen e TIKA-s për fakultetin.
Drejtori i Shkollës "Jashar Bej Shkupi", Rahim Maksuti, duke shprehur kënaqësinë e tij që ishte pjesë e kësaj ngjarjeje të rëndësishme për shkollën, tha: "Falë mbështetjes së çmuar të TIKA-s në Shkup, shkolla jonë është pasuruar me tre klasa moderne të cilat do t'u ofrojnë nxënësve tanë një ambient mësimor bashkëkohor të përshtatshëm dhe të pajisur sipas nevojave të kohës".
