Handan Kazancı
08 Korrik 2021•Përditësim: 08 Korrik 2021
Bashkimi Evropian shprehu mbështetjen e tij për Gjeorgjinë, ku komisioneri për Fqinjësi dhe Zgjerim të bllokut e përshkroi atë si "një partner kryesor" gjatë vizitës së tij në vend të mërkurën, transmeton Anadolu Agency (AA).
"Bashkimi Evropian qëndron pranë jush", tha Oliver Varhelyi në një konferencë për media me kryeministrin e Gjeorgjisë, Irakli Garibashvili në kryeqytetin Tbilisi.
“Ne kemi qenë jashtëzakonisht krenarë për ndihmën që ju dhamë vitin e kaluar. Kemi ndihmuar në ruajtjen e mbi 400 mijë vendeve të punës. Siguruam mbështetje për 78 mijë familje në Gjeorgji dhe kemi rritur numrin e shtretërve në repartin e kujdesit intensiv me mbi 1.400", shtoi Varhelyi.
Ai theksoi se të premten e kaluar, BE-ja prezantoi "Planin ambicioz Ekonomik dhe të Investimeve për të gjithë rajonin e vendeve të Partneritetit Lindor".
"Jemi të përkushtuar që të mobilizojmë të paktën 17 miliardë euro për rimëkëmbjen ekonomike të rajonit", tha ai.
“Nga kjo, ne do të kemi 2.3 miliardë euro grante dhe pjesa tjetër do të jenë projekte dhe investime të vendosura së bashku me partnerët tanë financiarë ndërkombëtarë si Banka Evropiane e Investimeve (BEI) ose Banka Evropiane për Rindërtim dhe Zhvillimi (BERZH)", tha ai.
Varhelyi gjithashtu tha se blloku dëshiron të "prezantojë në Gjeorgji Marrëveshjen e Gjelbër dhe planet Dixhitale".
“Ky plan kushtuar Gjeorgjisë duhet të sjellë së paku 3.9 miliardë euro investime. Kjo arrin pothuajse një të tretën e Prodhimit të Brendshëm Bruto (PBB) në kohë paqeje të vendit dhe PBB-në e vendit para krizës", shtoi ai.
Nga ana e tij, Garibashvili tha se 80 për qind e gjeorgjianëve mbështesin integrimin në BE.
"Rruga jonë e politikës së jashtme është një rrugë Euro-Atlantike që nuk mund të kthehet, rishikohet, ose ndryshohet", tha ai.
Duke iu referuar problemeve të integritetit territorial të vendit të tij në Abkhazi dhe Osetinë e Jugut, Garibashvili tha se ushtria ruse po qëndron ilegalisht në Gjeorgji deri më sot.
Sipas tij, Rusia nuk iu kishte përmbajtur kushteve të marrëveshjes së armëpushimit të Luftës së Osetisë së Jugut në 2008. Ai tha se Moska duhet të përmbushë përgjegjësitë e saj dhe të tërheqë trupat e saj nga Gjeorgjia.
Tbilisi zhvilloi një luftë pesë-ditore me Rusinë në vitin 2008 për rajonet e shkëputura të Gjeorgjisë, Osetinë e Jugut dhe Abkhazinë. Gjeorgjia humbi kontrollin e të dy zonave ndërsa Rusia më vonë njohu Osetinë e Jugut dhe Abkhazinë si shtete të pavarura.
