SHBA, rritet në 54 numri i viktimave nga shembja e ndërtesës në Miami

Është rritur në 54 numri i viktimave që janë gjetur në punimet e kërkim-shpëtimit në rrënojat e ndërtesës 13-katëshe e cila u shemb pjesërisht më 24 qershor në rajonin Surfside të Miamit në shtetin Florida të SHBA-së, transmeton Anadolu Agency (AA).

Kryebashkiakja e Miamit, Daniella Levine Cava në një konferencë për media tha se në punimet që vazhdojnë në rrënojat e ndërtesës, janë gjetur trupat e 8 personave të tjerë.

Ajo më tej shtoi se 33 nga 54 trupat e gjetur janë identifikuar dhe se janë ende 86 persona të zhdukur.

Derisa punimet e kërkim-shpëtimit kanë arritur në ditën e 14-të, Cava tha se pas kësaj nuk ka mbetur mundësi për të gjetur njerëz të gjallë nën rrënoja dhe se për këtë arsye punimet do të ndryshojnë në këtë drejtim.

"I kemi ezauruar me të vërtetë të gjitha alternativat që na janë ofruar në punimet e kërkim-shpëtimit. Të gjithë kërkuam nga Zoti një mrekulli", tha Cava e cila shtoi se edhe pse është e vështirë kanë vendosur që të kalojnë në punimet e kërkimit dhe heqjen e rrënojave në vend të kërkim-shpëtimit.

Gjysma e godinës luksoze me 270 apartamente u shemb papritmas

Në vendbanimin Surfside me një popullsi prej rreth 5.600 banorësh në veri të Miami Beach më 24 qershor u shemb papritmas gjysma e godinës luksoze 13-katëshe "Champlain" me 270 apartamente.

Zyrtarët e Surfsides në shkresat e kryera me administratorët e ndërtesës në vitin 2018, tërhoqën vëmendjen se në ndërtesën e ndërtuar në vitin 1981 ka një dëm të madh strukturor dhe se ka nevojë për riparime në vlerën prej rreth 9 milionë dollarë për kolonat e krisura dhe betonin i cili ka filluar të shkërmoqet.

Pjesa e mbetur e ndërtesës së mbetur u shemb në mënyrë të kontrolluar më 4 korrik në orën 22:30 sipas kohës lokale me arsyen se pjesa në fjalë nuk ishte e sigurt për shkak të stuhisë tropikale Elsa që iu afrua Floridas.