Fluturimet në dy aeroportet kryesore të Gjermanisë po përjetojnë ndërprerje të rënda pasi një grevë 48-orëshe nga sindikata "ver.di" po ndikon në operacionet e tyre, transmeton Anadolu.

Greva që filloi sot herët në aeroportet e Mynihut dhe Hamburgut do të vazhdojë deri të shtunën në mëngjes, duke ndikuar në shërbimet e shumta të aeroportit, përfshirë në kontrollin e pasagjerëve, trajtimin e bagazheve dhe operacionet e teknologjisë së informacionit.

Në aeroportin e Mynihut, aeroporti i dytë më i ngarkuar ajror i vendit, linjat ajrore anuluan pothuajse 1.300 nga 1.600 fluturimet e planifikuara gjatë periudhës dyditore. Aeroporti që shërben si një pikë kritike e lidhjes ndërkombëtare, zakonisht trajton qindra mijëra pasagjerë gjatë kësaj periudhe kohore.

Aeroporti i Hamburgut, me rreth 600 fluturime të planifikuara gjatë periudhës së grevës, ka përjetuar më shumë se 50 anulime deri më tani dhe paralajmëroi se vonesat dhe ndërprerjet janë të pashmangshme. Faqja e internetit e aeroportit i këshilloi pasagjerët se "priten ndikime të rëndësishme operacionale gjatë gjithë kohëzgjatjes së grevës".

Greva vjen mes një mosmarrëveshjeje në përshkallëzim midis punëdhënësve të qeverisë dhe sindikatës "ver.di", e cila përfaqëson punonjësit e sektorit publik. Sindikata kërkon rritje pagash prej 8 për qind ose rritje minimale mujore prej 350 eurosh për punonjësit federal dhe komunal.

Këtë javë, aksionet e grevës u planifikuan edhe në sektorë të tjerë publik, me greva të ngjashme në spitalet në Erfurt, objektet e menaxhimit të mbetjeve në Essen, si dhe në operacionet e portit, shërbimet sanitare dhe zyrat komunale në Hamburg.

Negociatorët e qeverisë kanë hedhur poshtë kërkesat e sindikatës, duke përmendur kushtet aktuale ekonomike dhe kufizimet buxhetore. Raundi tjetër i bisedimeve është planifikuar për më 14 dhe 15 mars.