Greqia përjashton mundësinë e vendosjes së trupave paqeruajtëse në Ukrainë

Greqia përjashtoi vendosjen e trupave paqeruajtëse në Ukrainë në kuadër të garancive të sigurisë për Ukrainën, si pjesë e një marrëveshjeje të mundshme paqeje me Rusinë, transmeton Anadolu.

Në një intervistë për transmetuesin SKAI, zëdhënësi i qeverisë greke, Pavlos Marinakis tha se Athina mendon pozitivisht për procesin e intensifikuar diplomatik për t'i dhënë fund luftës në Ukrainë.

"Ne duhet të theksojmë nevojën për një armëpushim të menjëhershëm dhe është gjithashtu pozitive që si SHBA-ja ashtu edhe shtetet evropiane janë të gatshme të marrin pjesë në ofrimin e garancive të sigurisë për Ukrainën", tha ai.

"Sidoqoftë, Greqia është një vend që respekton ligjin ndërkombëtar dhe nuk do ta dobësojë kurrë qëndrimin e saj kur bëhet fjalë për paprekshmërinë e kufijve", shtoi Marinakis.

Në mënyrë specifike për kontributin e mundshëm grek në garancitë e sigurisë për Ukrainën, Marinakis tha: "Aktualisht nuk ka perspektivë për të dërguar trupa greke në Ukrainë, as nuk po merret në konsideratë ndonjë plan i tillë për të ardhmen. Sidoqoftë, është shumë herët për të folur për diçka të tillë".

Përpjekjet për paqe për t'i dhënë fund luftës në Ukrainë arritën në një fazë të avancuar pas takimit të javës së kaluar midis presidentit të SHBA-së, Donald Trump dhe homologut të tij rus, Vladimir Putin në shtetin amerikan të Alaskës, dhe një takimi pasues të hënën në Washington midis Trumpit, presidentit ukrainas, Volodymyr Zelenskyy dhe udhëheqësve evropianë.

Pikat kryesore të ngërçit thuhet se janë shkëmbimet e mundshme të territoreve dhe garancitë e sigurisë për Ukrainën.