Kryediplomatët e Kinës dhe Rusisë diskutojnë konfliktin Izrael-Palestinë

Ministrat e Jashtëm të Kinës dhe Rusisë u takuan në Pekin dhe diskutuan marrëdhëniet midis vendeve të tyre dhe konfliktin midis Izraelit dhe Palestinës, raporton Anadolu.

Wang Yi priti homologun e tij Sergej Lavrov përpara forumit të tretë të Iniciativës Brez dhe Rrugë (BRI).

Para takimit të tyre, Lavrov tha: "Ne e konsiderojmë këtë projekt si një pjesë të rëndësishme të promovimit të bashkëpunimit mbi bazën e barazisë dhe përfitimit të ndërsjellë në të gjithë kontinentin Euroaziatik".

Më tej ai tha se marrëdhëniet mes dy vendeve po zhvillohen në kuadër të projektit, si dhe platforma të tjera rajonale dhe ndërkombëtare si Bashkimi Ekonomik Euroaziatik, Organizata e Bashkëpunimit të Shangait dhe ASEAN.

Sipas një deklarate nga Pekini, Wang tha: "Kina është e gatshme të punojë me Rusinë për të mbrojtur qëllimet dhe parimet e Kartës së Kombeve të Bashkuara dhe për të mbështetur të drejtën dhe drejtësinë ndërkombëtare".

Në lidhje me konfliktin palestinezo-izraelit, Wang tha se Kina dënon të gjitha veprimet që dëmtojnë civilët dhe kundërshton çdo praktikë që shkel ligjin ndërkombëtar.

"Është e nevojshme që Këshilli i Sigurimit i Kombeve të Bashkuara të ndërmarrë veprime dhe fuqitë e mëdha duhet të luajnë një rol aktiv," tha ai, duke shtuar se prioriteti kryesor duhet të jetë arritja e një armëpushimi dhe dhënia fund e luftës.

Të dy palët në konflikt duhet të kthehen në tryezën e bisedimeve, të krijojnë kanale ndihme humanitare emergjente dhe të parandalojnë fatkeqësi më të mëdha humanitare, shtoi ai.

"Strategjia themelore është aktivizimi i 'zgjidhjes me dy shtete' sa më shpejt të jetë e mundur dhe harta e rrugës për rivendosjen e të drejtave legjitime të kombit palestinez", deklaroi ministri i jashtëm kinez.

Krahas diskutimit të çështjeve dypalëshe dhe ndërkombëtare, Kina dhe Rusia po përgatiten edhe për një takim mes presidentëve të tyre, i cili pritet të zhvillohet këtë javë.

Presidenti rus Vladimir Putin është planifikuar të udhëtojë në Pekin për bisedime me homologun e tij kinez Xi Jinping. Putin pritet të marrë pjesë gjithashtu në forumin BRI.

Përfaqësues nga të paktën 140 vende dhe 30 organizata ndërkombëtare pritet të marrin pjesë në mbledhjen ndërkombëtare dyditore që fillon të martën në Pekin.