Libi, forcat qeveritare neutralizuan 15 milicë të Haftarit

Sulmet ajrore të qeverisë libiane të premten neutralizuan 15 pjesëtarë të militantëve të komandantit puçist Khalifa Haftar në afërsi të bazës ajrore të al-Watiya, raporton Anadolu Agency (AA).

"Forcat ajrore kryen sulme ajrore mëngjesin e sotëm në afërsi të bazës ajrore al-Watiya - 42 kilometra në juglindje të bazës", tha zëdhënësi i Ushtrisë së Libisë, koloneli Mohamed Qanunu në një deklaratë të bërë nga zyra e mediave të Operacionit të udhëhequr nga qeveria Burkan Al-Ghadab (Vullkani i tërbimit).

Al-Watiya, e cila ndodhet në jug-perëndim të kryeqytetit Tripoli, vlerësohet si një bazë ajrore kryesore në vend dhe është e dyta pas Aeroportit Ndërkombëtar Mitiga. Baza u pushtua në gusht 2014 nga forcat e Haftarit, udhëheqësi i forcave të armatosura të paligjshme në lindje të Libisë, i cili e përdori atë si selinë e tij për operacionet.

Qeveria e Libisë është sulmuar nga forcat e Haftarit që nga prilli i vitit 2019, me më shumë se 1.000 të vrarë në dhunë. Ajo filloi Operacionin "Stuhia e Paqes" më 26 mars për të kundërshtuar sulmet ndaj kryeqytetit.

Në kuadër të Operacionit “Stuhia e Paqes”, në mënyrë periodike janë duke u kryer operacione ajrore kundër bazës ajrore al-Watiya.

Pas rrëzimit të sundimtarit të ndjerë Muammar Gaddafi në vitin 2011, në vitin 2015 u themelua qeveria e Libisë nën një marrëveshje politike të udhëhequr nga OKB.