Turqia dënon sulmin me dron të Huthive ndaj Mekës

Turqia ka dënuar fuqishëm një sulm me dron të Huthive që kishte në shënjestër qytetin e shenjtë të Mekës në Arabinë Saudite, duke riafirmuar mbështetjen për sigurinë e mbretërisë, transmeton Anadolu.

“Dënojmë fuqishëm sulmin me dron të Huthive që kishte në shënjestër qytetin e shenjtë të Mekës”, tha Ministria e Punëve të Jashtme.

Jemeni është përfshirë nga lufta që kur Huthit morën nën kontroll kryeqytetin Sana dhe disa provinca në vitin 2014, duke nxitur një koalicion arab të udhëhequr nga Arabia Saudite të ndërhynte në vitin 2015 në mbështetje të qeverisë jemenase të njohur ndërkombëtarisht.

Grupi rebel është përfshirë në luftime të reja me forcat qeveritare që nga korriku, kur shpalli një bllokadë detare ndaj Riadit, ndërsa së fundmi ka pretenduar përparime përgjatë bregdetit të Detit të Kuq dhe Ngushticës Bab al-Mandab.

Huthit kanë vënë në shënjestër gjithashtu infrastrukturën e naftës të Arabisë Saudite.

Sot herët, koalicioni i udhëhequr nga Arabia Saudite tha se mbrojtja ajrore saudite interceptoi dhe shkatërroi një dron të lëshuar nga grupi Huthi i Jemenit në jug të Mekës, përpara se ai të hynte në hapësirën ajrore të kufizuar të qytetit të shenjtë.

Turqia, sipas ministrisë, riafirmon “mbështetjen për sovranitetin, integritetin territorial dhe sigurinë e Arabisë Saudite” dhe thekson “solidaritetin me Arabinë Saudite”.

“Përsërisim thirrjen tonë që këto sulme, të cilat gjithashtu kërcënojnë stabilitetin dhe sigurinë rajonale, të përfundojnë menjëherë dhe të shmangen të gjitha veprimet që synojnë përshkallëzimin e mëtejshëm të tensioneve”, thuhet në deklaratë.