Jurgen Klopp në fund të sezonit do të largohet nga pankina e Liverpool-it

Trajneri gjerman i futbollit, Jurgen Klopp, ka njoftuar se në fund të sezonit do të largohet nga klubi i Premierligës angleze Liverpool, transmeton Anadolu.

Në adresimin e sotëm para opinionit, Klopp theksoi se po i mbarojnë energjitë për ta bërë punën e tij.

Eksperti gjerman u emërua menaxher i "Redsave" në tetor të vitit 2015, ndërsa kontrata aktuale ishte paraparë të zgjaste deri më 2026.

"Unë i njoftova njerëzit në klub që në nëntor se do ta lë punën në fund të sezonit. E kuptoj se është një tronditje për shumë njerëz në këtë moment, kur e dëgjojnë për herë të parë, por mundem ta shpjegoj ose të paktën të përpiqem ta shpjegoj”, tha Klopp, sipas mediave britanike.

Ai tha se adhuron gjithçka që lidhet me Liverpool-in, si klubin ashtu edhe qytetin, por se e mori vendimin për t'u larguar i bindur se ishte hap i duhur.

“Si të them, po më soset energjia. Tani nuk kam probleme, natyrisht, e kam ditur për një kohë të gjatë se do të më duhet ta publikoja në një moment, por tani jam plotësisht mirë. Pas viteve që kaluam bashkë dhe pas gjithë kohës që kaluam së bashku dhe pas të gjitha gjërave që kaluam së bashku, respekti im për ty u rrit, dashuria ime për ty u rrit dhe më e pakta që të detyrohem është e vërteta”, tha Klopp ndër të tjera në video-mesazhin e publikuar në faqen zyrtare të Liverpool-it.

Klopp udhëhoqi Liverpoolin në Kampionatin Evropian në vitin 2019, duke mposhtur Tottenhamin në finalen e Ligës së Kampionëve në Madrid. Më pas ai fitoi Superkupën e Evropës dhe Kupën e Botës për Klube FIFA, dhe më pas titullin kampion i Anglisë. Gjithashtu, me “të kuqtë” arriti Kupën, Kupën e Ligës dhe Superkupën e Anglisë.

Interesante është se ai e shpalli vendimin e tij për t'u larguar nga Liverpool në fund të sezonit në një kohë kur Redsat kryesojnë tabelën e Premier Ligës angleze.

Në karrierën e tij, gjermani drejtoi edhe Mainzin dhe Borussia Dortmundin.