Tokio 2020, SHBA arrin në finale në basketboll

Ekipi përfaqësues amerikan mundi Australinë në ndeshjen gjysmëfinale të basketbollit për meshkuj në Lojërat Olimpike Tokio 2020, raporton Anadolu Agency (AA).

Kevin Durant dhe bashkëlojtarët e tij u kthyen nga një negativë prej 15 pikësh për të mposhtur Australinë me rezultat përfundimtar 97-78, duke avancuar në finalen e tyre të katërt radhazi për medaljen e artë në Olimpiadë.

Ekipi përfaqësues i Australisë asnjëherë nuk ka arritur në finale dhe pësoi humbjen e pestë në gjysmëfinalet e lojërave olimpike.

Durant me 23 pikë, nëntë kërcime dhe dy asistime e çoi ekipin e tij drejt fitores, ndërsa Devin Booker gjithashtu shënoi me 20 pikë, tre kërcime dhe një asistim.

Në finalen e caktuar për më 7 gusht, SHBA do të përballet me fituesin e gjysmëfinales Francë-Slloveni.