Li Sûriyeyê ji bo 3 herêman li ser agirbestê li hev kirin

ÎDLIB

Hat ragihandin ku li Sûriyeyê heyeta Îranê ya ku li ser navê rejîmê gotûbêjan dimeşîne, bi muxalifan re li hev kir ku li 3 herêman ji bo 6 mehan agirbest were îlankirin.

Ji Tevgera Ahraru'ş-Şam a muxalif berpirsekî ku nexwest navê wî were eşkerekirin daxuyanî da peyamnerê AAyê û diyar kir ku di navbera muxalif û heyeta Îranê ya ku li ser navê rejîmê gotûbêjan dimeşîne de lihevkirinek pêk hat û li gorî vê lihevkirinê dê li navçeya Zebedanî ya Şamê, li Kafarya û Fûaya navçeyên Îdlibê ji bo 6 mehan agirbestê were îlankirin.

Berpirs destnîşan kir ku li gorî peymanê, ji navçeyên Kafarya û Fûayê yên ku piraniya wan Şîa ne digel jin û zarokan dê biqasî 10 hezar kesî derbasî herêmeke di kontrola rejîmê de be û beramberê vê jî muxalifên çekdar ên li Zebedaniya navçeya Şamê dê tenê çekên xwe yên sivik hildin û derbasî devereke Îdlibê ya ku di kontrola muxalifan de ye, bibin.

"Rejîmê hezar mêr û 500 jinên girtî dê serbest berde"

Berpirs bal kişand ku di heyama agirbestê de firokeyên şer ên rejîmê dê êrîşê bajarokên mîna Fûa, Kafarya, Bînnîş, Taftanaz, Maret Nasrîn, Ram Hamadan û Zaranê nekin. Berpirs got ku herwisa rejîmê hezar mêr û 500 jinên girtî serbest berde.

Hat ragihandin ku madeyên ewil ên peymanê dê îro ji serê sibehê û pê de werin cîbicîkirin.