Qersî şa bûn ku îşareta erdnîgarî dan "penêrê gravyer"

Li Qersê "penêrê gravyer" ku ji şîrê çêlekên zozanên bilind tê çêkirin, hat tescîlkirin û şêniyên herêmê bi tescîlbûna penêr şa bûn.

Odeya Bazirganî û Sanayiyê ya Qersê (KATSO) di sala 2021ê da serî li Enstîtuya Patent û Marqeya Tirk da û saziyê di 17ê Îlonê da belgeya tescîlê da penêrê herêmî.

Hilberîner ji mandireyên bajêr şîr berhev dikin û wî şîrî seba penêr di çend qonaxan da amade dikin û paşê berdidin sîtilan û heta ku bibe lor dikelînin.

Şîr ji sîtilan berdidin qaliban û 48 saetan datînin ku bibe penêr. Paşê di navbera 6 û 9 mehan da li cihekî mihafeze dikin.

Hilberîner û dezgehên ku penêr difroşin, ji bo tescîlkirina penêrê gravyer şa bûn û wê di sezona nû da êdî penêrê gravyer ê tescîlkirî bifiroşin.

Firoşkar Furkan Turut ji nûçegihanê AAyê ra got ku tescîlkirina gravyerê Qersê hilberîner û firoşkar pir şa kir.

Ji welatiyan Oguz Ozdemir jî daxuyand ku penêrê gravyer ji şîrekî pir taybet tê çêkirin û wiha dewam kir, "Gravyera me ya ku tehma wê pir xweş e, hat tescîlkirin. Ser xêrê be, em pêşniyaz dikin ku her kes tehma vî penêrî binihêre."