Li Mûşê welatî ji zozanan vedigerin

MÛŞ

Li Mûşê ji ber ku hewa êdî sar dibe welatiyên ku derketibûn zozanan hêdî hêdî vedigerin gundên xwe.

Welatiyên ku havînê çûbûn zozanên Yucetepe, Baxçe, Dêrîk û Kurtukê ji ber ku hewa sar dibe vedigerin gundên xwe yên Yucetepe û Baxçeyê.

Îslam Tanê 30 sal e li gundê Yucetepyê şivantiyê dike got ew biharê diçin Zozana Dêrîkê ya ku 20 kîlomêtro dûrê wan e û heywanên xwe li wir xwedî dikin.

Tan got ew sê mehan li zozanê dimînin û wiha axivî: "Em êdî vegeriyan. Em li zozanê penêr, qatix û rûnê nivîşk hildidin. Heke Xwedê nesîb bike emê saleke din dîsa herin zozanan. Tekane daxwaza me ew e ku bila li welatê me aramî çêbe."

Cîhan Yildirim jî got jin li zozanan rojê du caran heywanan didoşîn û çend roj şunda ev kar jî wê dawî bibe.

Berîvan Nazmiye Tanê jî got ew zozanan vegeriyane û dema berf bibare ewê heywanên xwe bibin cihên germ.