سەربازانی ئەمریکا گەیشتنە هەولێر

هەولێر - AA

ژمارەیەک لە ھێزەکانی ئەمریکا کە لە سووریا کشاونەتەوە، بەشێکیان بەرەو مووسڵ و ئەنبار بەڕێکەوتن و بەشێکیشیان گەیشتنە هەولێر و بەرە فڕۆکەخانەی نێودەوڵەتی هەولێر بەڕێوەن.

کاروانەکەی هێزە سەربازییەکەی ئەمریکا، نزیکەی ٤٠ ئۆتۆمبێلی جۆراوجۆر دەبن کە سەربازیی و مەدەنین و چەند بارهەڵگرێکیش لەناو کاروانەکەدا هەیە.

دوای بڕیاری سەرۆکی ئەمریکا، دۆناڵد ترەمپ بە کشانەوەی سوپای وڵاتەکەی لە باکووری سووریا، ژمارەیەکی زۆر ھێزی ئەمریکا روویان لە عێراق کرد، ژمارەیەکیان گەیشتنە هەولێر و ژمارەیەکیشیان بەرەو پارێزگاکانی مووسڵ و ئەنبار رۆیشتوون.

ھاوکات لەگەڵ پڕۆسەی کشانەوەکە، فڕۆکە شەڕکەرەکانی ئەمریکا و کۆپتەرێکی ئەو ھێزانە لە ئاسمانەوە، چاودێری دۆخەکە دەکەن.

پێشتریش وەزیری بەرگریی ئەمەریکا، مارک ئەسپەر رایگەیاندبوو ئەم ھێزانەی كه‌ لە سووریا دەگەڕێنەوە لە رۆژئاوای پارێزگای ئەنبار باشووری عێراق جێگیر دەکرێن.