توركیا خۆشحاڵه‌ به‌ واژۆكردنی به‌یاننامه‌ی ده‌ستووری سوودان

ئه‌نقه‌ره‌ - AA

توركیا خۆشحاڵیی خۆی نیشاندا به‌ واژۆكردنی به‌یاننامه‌ی ده‌ستوور كه‌ ده‌بێته‌ ده‌ستپێكی قۆناغی راگوزه‌ری هاوبه‌ش له‌نێوان ئه‌نجوومه‌نی سه‌ربازيی و ئۆپۆزسیۆنی مه‌ده‌نیی سووداندا.

له‌ راگه‌یه‌نراوێكی وه‌زاره‌تی ده‌ره‌وه‌ی توركیادا هاتووه‌،"خۆشحاڵین به‌وه‌ی ئه‌مڕۆ له‌ سوودانی دۆستمان له‌چوارچێوه‌ی قۆناغی راگوزه‌ردا به‌یاننامه‌ی ده‌ستوور له‌نێوان ئه‌نجوومه‌نی سه‌ربازيی و نوێنه‌رانی هاوپه‌یمانێتیی هێزه‌كانی ئازادی و گۆڕانكاری واژۆكراوه‌."

له‌ راگه‌یه‌نراوه‌كه‌دا هیوا خوازراوه‌ له‌قۆناغی ئاینده‌دا حكوومه‌تێكی گشتگر دابمه‌زرێت كه‌ داواكاریی گه‌لی سوودان به‌رجه‌سته‌ بكات و ساتێك زووتر سه‌قامگیری بۆ ئه‌و وڵاته‌ بگه‌ڕێته‌وه‌.