مانۆڕە سەربازییەکەی سلۆپی-خابوور بەردەوامیی هەیە

شرنەخ- AA

مانۆڕی سەربازیی هاوبەشی هەریەک لە سوپای تورکیا و عێراق کە لە رۆژی ١٨ی ئەیلوولدا لە شارۆچکەی سلۆپی سەربە شرنەخ و لە نزیک دەروازەی سنووریی خابوور دەستیپێکردووە، درێژەی هەیە.

سەرۆکایەتی ئەرکانی سوپای تورکیا رایگەیاند مانۆڕەکە بە بەشداریی فەیلەقی حەوت و لیوای ٢٨ی میکانیکی سوپای تورکیا بە هاوبەشی لەگەڵ یەکەکانی سوپای عێراق و لە دووریی سێ کیلۆمەتر لە دەروازەی سنووریی خابوور بەردەوامە.

لەچوارچێوەی رێکارە پێویستەکانی مانۆڕەکەدا، یەکەیەکی سەربە لیوای میکانیکی بە شێوەیەکی تاکتیکی گوازرانەوە و لەو میانەشدا سەربازانی هەردوولا رێکاریان لەبەرامبەر هێرشی ئاسمانیی، پەلامارەکان و ئەو کەمینانەی کە دوژمن دەینێتەوە و هاتوچۆ لە ناوچە هەستیارەکاندا، گرتەبەر.

هەر لە چوارچێوەی مانۆرەکەدا راهێنان لەسەر پەلاماردانی ژمارەیەک لە سەربازان و تێکشکاندنی هێرشەکە لە لایەن ژمارەیەک یەکەی سەربازییەوە بە ئۆتۆمبیلی زرێپۆشەوە، کرا.

سەربازانی سوپای عێراق و تورکیا دوای ئەنجامدانی راهێنانەکە، بە ئۆتۆمبیلی زرێپۆش گەڕانەوە یەکەکانیان.