ئه‌ردۆغان و تره‌مپ گفتوگۆیان كرد سه‌باره‌ت به‌ لیبیا و ئیدلب

واشنتۆن - AA

كۆشكی سپی بڵاویكرده‌وه‌ كه‌ سه‌ركۆماری توركیا، ره‌جه‌ب ته‌یب ئه‌ردۆغان و سه‌رۆكی ئه‌مریكا، دۆناڵد تره‌مپ په‌یوه‌ندییەکی ته‌له‌فۆنییان ئه‌نجامداوه‌ و دۆسیەكانی لیبیا و ئیدلب-یان تاوتوێكردووه‌.

جێگری گوته‌بێژی نووسینگه‌ی راگه‌یاندنی كۆشكی سپی ، جود دیری راگه‌یه‌ندراوێكی سه‌باره‌ت به‌ په‌یوه‌ندییه‌ ته‌له‌فۆنییه‌كه‌ی ئه‌ردۆغان و تره‌مپ بڵاوكرده‌وه‌.

له‌ راگه‌یه‌ندراوه‌كه‌دا هاتووه‌ ''هه‌ردوو سه‌رۆك گفتوگۆیان كردووە له‌سه‌ر پێویستی راگرتنی ده‌ستوه‌ردانی ده‌ره‌كی له‌ لیبیا و درێژه‌دان به‌ ئاگربه‌ست له‌و وڵاته‌دا و هاوڕابوون له‌سه‌ر كۆتاییهێنان به‌و توندوتیژییه‌ی له‌ ئیدلب درێژه‌ی هه‌یه‌''.

له‌ راگه‌یه‌ندراوه‌كه‌دا هەروەها ئاماژه‌ به‌وه‌ كراوه‌ كه‌ دۆناڵد تره‌مپ جه‌ختی له‌سه‌ر گرنگیی چاره‌سه‌ركردنی ناكۆكییه‌كانی توركیا و یۆنان كردووه‌ته‌وه‌ سه‌باره‌ت به‌ ده‌ریای ناوه‌ڕاست.