فەڕەنسا گەیشتە یاری کۆتایی یۆرۆ ٢٠١٦

مارسیلیا - AA

شەوی رابردوو و لە یاری پێش کۆتایی یۆرۆ٢٠١٦دا، هەڵبژاردەی فەڕەنسا توانی گرێکۆرەی شکستەکانی بەرامبەر بە هەڵبژاردەی ئەڵمانیا بکاتەوە و بە دوو گۆڵی خاوێن خۆی بگەیەنێتە یاری کۆتایی.

له‌ گێمی یه‌که‌مدا ئه‌ڵمانیەکان زیاتر کۆنترۆڵی تۆپیان کرد و مەترسیان زیاتربوو بەڵام لە خولەکی زیادکراوی گێمی یەکەمدا لێدانێکی سزا لە دژی ئەڵمانییەکان هەژمار کرا و ئەنتۆنیۆ گریزمان توانی بە سەرکەوتوویی گۆڵ تۆمار بکات و فەڕەنسییەکان پێش بخات.

له‌ گێمی دووه‌مدا ئه‌ڵمانیا جارێکی دیکە هه‌وڵیدا به‌ کۆنترۆڵی یاریگا شکست به‌ ڕکابه‌ره‌ سه‌رسه‌خته‌که‌یان بهێنن به‌ڵام هیچ ئەنجامی نەبوو تا لە خولەکی ٧٢دا و لە هەڵەیەکی بەرگریدا ئەنتوان گریزمان گۆڵی دووەمی خۆی و دووەمی هەڵبژاردەکەی تۆمار کرد.

بەم ئەنجامەش یاری بە کۆتا هات و هەڵبژاردەی فەڕەنسا شان بەشانی هەڵبژاردەی پورتوگال گەیشتە یاری کۆتایی کە بڕیارە لە ١٠ی ئەم مانگە لە شاری سانت دێنیسی فەڕەنسی بەڕێوەبچێت.